Совети за идни и новопечени мајки

Грижата за своето тело и за убавината на лицето е незаобиколна работа кај секоја жена. Секоја од нив има свој ритуал и свое катче во салонот каде што се чувствува посебна. Кога жената ќе забремени, се менува многу нешто, нејзините навики и нејзините интереси, но сигурно не се откажува од негата на лицето и телото. Се менува само пристапот кон одржувањето: некои третмани се непожелни во бременост и во текот на доењето, но многу од нив можат без грижа да продолжат. Жените во интересна состојба секако се на претпазливост и се откажуваат од многу нешта, па за третманите за лице и тело ги прашавме стручњаците. На нашите прашања одговара Исидора Стојановиќ, магистер по фармација и специјалист по козметологија.

Третмани за лице: што смее, а што не

Класичните хигиенски третмани, биолошките третмани или третманите со хранливи и хидратантни ампули се дозволени ако тоа ѝ е потребно на кожата. Обично жените во бременост се разубавуваат: кожата е поубава, косата и ноктите се посилни и мал е бројот на жени кои имаат проблеми. Лупење, црвенило, засилена парцијална пигментација, па дури и акни се само некои од промените кои се јавуваат на кожата во текот на тие девет месеци, па класичните хигиенски третмани се прават доколку тоа ѝ е потребно на кожата.

Со оглед на тоа што кожата во бременост е почувствителна, акцентот се става на органските третмани и препарати без конзерванси, парабени и парфем. На својот козметичар секогаш треба да му нагласите дека сте во интересна состојба. Умерената масажа на лицето е многу корисна и многу опуштачка. Третманите кои се прават со апаратурна козметика не се препорачуваат поради разните струи.

Бремени жени и доилки

Бремените жени и доилките главно се третираат исто. По породувањето најголемиот дел од физиолошките промени на кожата на лицето и телото настанати во текот на бременоста, а поврзани со хормонскиот статус, спонтано се повлекуваат, па по доењето може да се тргне со поинтензивни козметички третмани. Настанатите пигментни промени полека се повлекуваат и бледнеат, па сè уште не треба да се третираат и отстрануваат. Кожата на доилките лесно дехидрира, затоа акцентот е на хидратацијата: во салонот постои широк спектар хидратантни третмани со кои тоа успешно се балансира.

Шминка, трајна шминка и трепки

Сите третмани кои ја подигаат телесната температура, како што се јапонското исцртување на веѓите, перманентниот make up и останатите видови трајна шминка, не се препорачуваат во бременост и во периодот на доење. Доколку сепак се одлучите за ваков третман, можно е лошо примање на бојата поради влијанието на хормоните. Самата шминка е безбедна и можете да ѝ се препуштите на нејзините чари, само е важно пудрите во составот да немаат ретиноиди. Младите мајки можат да ставаат и свилени трепки, кои се безбедни, но ни со тие работи не треба да се претерува бидејќи организмот во бременост е почувствителен.

Масажа во бременост

Професионалната масажа за бремени жени е одличен начин да се опуштите во интересна состојба и е многу барана во Медеја. Масажата помага во ослободувањето на токсичните материи, ги намалува отоците и грчевите и ја поттикнува циркулацијата. Масажите на телото во бременост треба да бидат благи, се користат неутрални масла и главно се прават во странична положба, бидејќи треба да се избегнува лежење на стомак и подолго лежење на грб. Ароматичните масла не се препорачливи.

Целулит, стрии и капилари

Поради наглата промена на хормоните во телото, целулитот е голем проблем во бременост, но антицелулит масажата не се препорачува. Антицелулит масажата, како и другите антицелулит третмани, не се препорачливи во текот на бременоста и доењето, а забранети се и антицелулит препаратите чии активни супстанци се силни и продираат во крвотокот. Најефикасниот начин за борба против целулитот во бременост е правилната домашна нега: лесна физичка активност, внес на многу вода и исхрана на база на овошје и зеленчук.

Обемот на стомакот во бременост се зголемува преку 50 сантиметри, што е големо оптоварување. Доколку сврзното ткиво во подлабоките слоеви е послабо, доаѓа до пукање и појава на стрии на кожата, а на тоа е повеќе подложна сувата и помалку еластична кожа. Иако многумина велат дека кај стриите нема помош бидејќи станува збор за генетска предиспозиција, кожата во бременост е неопходно да се третира со хидратантни и хранливи препарати, а најдобри природни се shea путер, кокосово масло и лешник. Пукањето на капиларите на лицето и нозете во текот на бременоста не го предизвикува депилацијата, туку високото ниво на естроген.

Самопотемнување, нокти и депилација

Употребата на солариум е строго забранета. Во Медеја постои апарат за потемнување Air brush, чии препарати се на растителна база, и често се прави кај бремени жени, особено кога станува збор за венчавка, со задолжителна проверка дали ќе дојде до алергија.

Во бременост ноктите значително побрзо растат и предност им се дава на маникирот и педикирот. Не се препорачуваат гелови, акрил и УВ ламба, лакирањето треба да се сведе на минимум, а отстранувачите на лак треба да бидат без ацетон. Многу е важно маникирот и педикирот да ги направи професионално лице, бидејќи се изведуваат нежно и без каква било повреда. Кај педикирот е важно стапалата да се држат кратко во вода на определена температура, а во салонот често се прават и суви педикири. Се препорачуваат и благи масажи на стапалата, особено поради отоците и грчевите. Што се однесува до депилацијата, препораката од Медеја е депилација со шеќерна паста, чиј состав е 100% природен и безбеден.